Demo Damai BBM ala Emak dan Encum

Dihari senin yang ceraaaaaaaaaaaaaaaaaaaah banget, Babenya Encum lagi serba sibuuuuk banget. Yang bikin Encum heran juga itu kenapa si Babe pake segala iket kepala. Mau ngapain coba??

Encum : widiiiiiih Babe ude kayak pejuang jaman dulu aje be pake iket kepala segala. Mau ngapain dah??

Babe : Babe mau ikutan demo cum..

Encum : demo?? Demo apaan be?

Babe : Babe mau ikutan demo karena kenaekan harga BBM cum.

Encum : laaah?? Babe ngapain daaah ikut ikutan begonoan? Emang Babe dapet duit ikutan demo demo segala?

Babe : kagak sih cum.

Encum : diiih si Babe.. kagak guna banget da aah ikutan begonoan..

Babe : yaa pan buat menyatakan aspirasi masyarakat cum. Jadi Babe ikutan. Kesian pan gegara harga BBM naek terus sembako pada ikutan naek. Kasian noh Emak lo beli cabe dua rebu dapetnya Cuma lima biji doang. Mana berasa kalo bikin sambel cabenya suma segitu doang.

Encum : yaelaaaaah… jadi Babe karena sambel doang ikutannya?? Noh dikebon belakang pan poon cabe rawit seabrek be. Tinggal petik juga jadi.

Tiba-tiba Emaknya Encum nongol.

Emak : ini apa apaan dah pada ribut begini yak pagi pagi??

Encum : noh mak, si Babe gegayaan bener dah pengen ikutan demo katanya.

Emak : demo??

Encum : iyee demo karena harga BBM naek mak.

Emak : laaaa si Babe ngapain sih ikutan demo?? Mau jadi pahlawan kesiangan be?

Babe : yaelaaaaah… mau menyuarakan aspirasi dan unek unek ini pan. Emangnya lo kagak rugi ape beli cabe dua rebu Cuma dapet lima biji doang?? Terus harga sembako yang laen pada naek juga.

Emak : be, kalo cuma cabe doang mah kagak masalah. Noh poon cabe rawit banyak dikebon belakang tinggal metik. Tapi kalo alasan Babe pengen menyuarakan aspirasi, emang kudu pake demo demo gini segala ye? Emang ga ada cara laen lagi? Emang kalo Babe ikutan demo itu harga BBM bakalan turun lagi? Terus harga sembako juga bakalan langsung mendadak turun?? Kagak kaleee be.

Encum : tau noh si Babe. Omelin aje mak… omelin…

Emak : nih be, sekarang aye nanya sama Babe, Babe kerja apaan sekarang pake segala gegayaan mau ikutan demo seharian melentung?

Babe : sopir angkot.

Emak : sehari dapet berape penghasilannye?? Kagak tentu pan??

Babe : iyee…

Emak : coba sekarang kalo Babe mikir, sehari aja penghasilannye belon tentu, apalagi kalo Babe bolos kagak narik sehari, malah kagak dapet ape ape kan?? Boro boro duit buat makan, yang ada Cuma dapet capek, gerah sama panas doangan.

Babe  : tapi pan Babe bela masyarakat mak. Biar kagak rugi semuamuanye.

Emak : kalo Babe demo, lewat jalan umum pan?? Bikin macet kagak tuh?? Macet kan?? Nah yang kena macet itu bisa bocah bocah yang pada mau sekola, orang orang yang pade mau kerja, atau ibu ibu yang pada mau kepasar beli sayur buat makan keluarganye. Mereka masyarakat juga bukan?? Mereka rugi juga kagak? Rugi kan?? Malah ruginya banyak. Rugi waktu, rugi duit, rugi perasaan juga gegara keburu enek duluan dijalan sebelon nyampe tujuan. Yang kerja bisa pada kena surat peringatan gegara telat, yang bocah sekola bisa pada di strap, yang kesiangan beli sayur bisa pada kagak sarapan pagi keluarganye.

Encum : noh be, dengerin Emak. Lagian Babe ngapain sih jadi kayak abege labil gitu be? Pemerintah pan pasti udah punya kebijakan sendiri be, dan pasti mereka juga udah memperhitungkan walaupun kite pada kagak tau perhitungan mereka kayak apaan.

Emak : nih be, Babe pan sopir angkot nih, sering ngeluh pan kalo ada bocah bocah sekolaan yang pada ikut demo atau tawuran. Laaa sekarang coba Babe mikir, anak muda itu rentan niru kelakuan orang yang lebih tua. Yee pantes aje kalo anak muda jaman sekarang pada demen demo sama tawuran, laaa yang tua juga pada begitu. Jadi yang tua tuh kudu ngasih contoh yang baek. Mau ntar anaknye ikutan kayak Babenye juga demo demoan begitu??

Encum : iyee be. Pan Babe sering ngelarang Encum buat ikutan demo demo atau tawuran gitu. Pan Babe sendiri yang bilang kalo kagak ada gunanya. Kok sekarang malah Babe yang pengen ikutan demo.

Babe : … *speechless*

Emak : noh… Babe liat tipi kagak?? Sampe ada yang berdarah darah Cuma gegara demo kenaekan harga BBM doangan. Lebih rugi lagi pan?? Rugi nyawa be. Kagak ngapa dah harga sembako naek, asal seorang istri ngaturnya bener mah keluarga masih bisa tetep makan be. Bersyukur. Masih ada yang kagak bisa makan. Kalo Babe mau nyeletuk lagi terus bilang pengen ngebela yang kagak bisa makan, aye sautin lagi nih… kalo pengen ngeliat yang kagak bisa makan jadi bisa makan, ya kite yang idupnya termasuk kecukupan kudu banyak banyak sedekah. Kalo emang mampu pake premium, pake dah premium. Jangan kayak orang orang tertentu yang udah ketauan mampu malah pake BBM yang bersubsidi. Itu kagak bersyukur be. Hemat sih hemat, tapi malah orang orang kayak gitu pan yang bikin rugi Negara.

Encum : hayolooooh be… diceramahin panjang lebar pan tuh sama si Emak. Mending kita ikutan demo tapi demo damai be. Demo secara damai yang ga ngerugiin kite juga. Kayak yang tadi Emak bilang pan, demo yang pertama itu kita kudu bersyukur sama kehidupan kite yang berkecukupan. Demo damai kedua itu kite pake BBM yang seharusnya emang diperuntukan buat orang yang mampu. Biar dikate Babe sopir angkot, tapi pan Babe banyak kerjaan laen selaen angkot. Rezeki udah ada yang ngatur be. Demo damai ketiga, kalo kagak mau rugi ya jangan ngerugiin orang laen. Jadi kagak usah ikutan demo demoan yang bikin rugi lebih banyak orang lagi. Daaaaaaaaan…

Babe : iyee iyee iyee… udah! Udah! Babe ngarti sekarang. Iyee Babe bakalan ngikutin demo damai BBM ala Encum sama Emak…

Emak : gitu kek dari tadi biar kagak emosian nih kite berdua…

-sekian-

Masih ada yang mau ikutan demo?? Entah demo apapun itu… masih mau ikutan?? Kayaknya kudu baca lagi nih omelannya si Emak biar pada ga ikutan demo demoan lagi…

14^th Blogger Campaign Project – Bloggers’ Shout Out